Russia sipaite'n Ukraine khawchhak lama Kreminna khua an la

Russia sipaite chuan Ukraine khawchhak lama Kreminna khua chu an la tawh a,he khuaa Ukraine sipai awmte pawh a inthiarfihlim tawh tih regional governor chuan a sawi.

Ukraine-Russia indo hma hian Kreminna khuaah hian mi 18,000 chuang an khawsa a ni. Russia sipaiten Ukraine khawchhak Donbas region an beih hnuah an khaw lak hmasa ber a ni.

"Kreminna chu 'Orcs' (Russia) kutah a awm tawh," tiin Luhansk region governor Serhiy Gaidai chuan Thawhlehni khan a puang. "Venhim hna thawktute chu an inhnukdawk a, hmun hranah insawnin Russia sipaite an bei chhunzawm zel a ni," a ti. Russia hian engtiang chiahin nge Kreminna hi an lak an hriat loh thu leh kil tin aṭanga beihna an tawh thu a sawi. "Civil mi zinga thi zat chhut theih a ni lo. Official chhinchhiah danin mi 200 vel an thi a, mahse a nihna takah chuan hei ai hian an tam zawk a ni," a ti.

Russia hian February 24 khan Ukraine lakah special military operation tih hming chawiin inbeihna hi an kalpui ṭan a, civil mite an bitum loh thu an sawi. Thawhlehni khan Ukraine chhak lama thil siamchhuahna hmunpui lak tumin ṭan an khawh leh ṭan a, khawpui leh thingtlang khuate chu luhchilhin ṭhenkhat chuan indo thawh hnihna niin an sawi bawk a ni.

Russia defence ministry thupuangtu, major general Igor Konashenkov chuan missile kahchhuah hmangin Ukraine sipai 13 leh ralthuam awmna tihchhiat a ni a, an air force-te chuan Ukraine military facility 60 kap fuhin, missile warhead dahṭhahtna pawh an kapchhe bawk niin a sawi.

Inbeihna hi Thawhṭanni aṭanga inṭanin, Ukraine hmarchhak aṭanga chhim lam km 480 a thui a huam a ni. Russia chuan missile hmangin hmun tam tak an kah tawh thu sawiin, hmarchhak lama khawpui Kharkiv bakah Zaorizhzhia leh Dnipro-te pawh beih an ni.