Sri Lanka buaina chhuakah mi pakhat thi, 13 in hliam tuar

Sri Lanka chhimthlang lam, Rambukkana-ah sorkar laka lungawi lo pungkhawmte hnawhdarh tuma police-ten silai an hmehpuahnaah mi pakhat a thi a, he thihna hi an ram economy tlakchhiat avanga lungawi lohna lantirna kalzela thihpui an awm hmasak berna a ni. Mi dang 13 bakah venhim lam hnathawktu police 15 in hliam an tuar bawk.

Colombo aṭanga km 90-a hlaa awm Rambukkana mipuite hian fuel man thar ber an tihchhuah chu a sang uchuak nia ngaiin lungawi lohna hi an lantir hnuah police-te nen hian an intawng zui a ni.

Mipuite hian Rambukkana-a rel kawng an dang a, police-te chuan kawng hi kaltlang tir tura an ngen hnuah mipuite hian lungin an bei zui ta mai niin an sawi. Police-te hian pungkhawmte chu an awmna hmun chhuahsan tur hian an hrilh zui a, mahse mipuite hian fuel bowser leh three-wheeler chu hal an tum a, bungruate pawh an tichhe zui bawk. Hei vang hian mipui hnawhdarh nan police-te chuan tear gas kapin, a hnuah silai an hmetpuak zui leh bawk. Police-te silai hmehpuahah hian mi pakhat thiin, pungkhawm zinga mi 13 in hliam an tuar bawk. Hliam tuar zinga mi palite chu an ngaihtuahawm hle nia sawi a ni.