UK PM Johnson-a'n Parliament-ah ngaihdam a dil

Britain prime minister Boris Johnson chuan Covid-19 vanga an ram lockdown inkaihhruaina siam a bawhchhiat avangin Thawhlehni khan Parliament-ah ngaihdam a dil a, hripui len laia piancham lo lawm chu ama dan siam bawhchhiatna nia a lo ngaih loh thu a sawi.

Opposition lawmaker-te chuan Prime Minister hi bang tura phutin, Covid-19 hri len chhung khan inkaihhruaina khauh tak a siam a, a dan siamte chu Downing Street-ah amah ngeiin bawhchhe lehin Parliament hmaah inkaihhruaina a siamte chu an zawm vek tiin dawt vawi tam tak a sawi nawn a ni, an ti.

Johnson chuan dik lo taka Parliament hruaikawi tumna a neih loh thu House of Common hmaah a sawi a, dan bawhchhia nia inngaihna a lo neih loh thu a sawi. Mipuiten a laka beiseina sang tak an nei pawh chu a hriatthiampui tih a sawi bawk.

House speaker chuan Parliament bum tuma PM Johnson puh a nih chungchangah, chhui zui a nih dawn leh dawn lohah vawiinah hian vote lak a nih mai theih thu a sawi. Ministerial code hnuaiah, tum reng vanga Parliament-a dawt sawi leh bum tumte chu an hna aṭanga ban tir theih hiala pawikhawihna angah ngaih a ni.

"Police hnen aṭanga hriattirna ka dawn veleh khan an thinrimna leh lungawi lohna ka hriatthiampui a, mipui hian Prime Minister chungah beiseina sang tak an neih a thiang a ni," tiin Johnson chuan Parliament a hrilh.

Labour hotu Keir Starmer chuan inkharkhip laia British mipui tawrhna leh office zah loah PM hi puhin bang turin a phut. "PM hian kan politics zahawmna, rinawmna leh thianghlimna vawng zel thei tura hun remchang a nei a, he ram hmingchhiatna titawp theitu tur a ni," a ti. Johnson chuan nikum December thla khan inkharkhip chungchanga khuah­khirhnate chu a zawm kim vek thu a sawi. Mahse khuahkhirhna kalpui lai hian Downing Street-a party an neih chungchangah police-te chuan pawisa an chawitir a ni.