Russia-in nuclear kap chhuak thei missile enchhin
Ukraine laka thla hnih dawn indo beihpui an thlak hnuah, Russia chuan Nilaini khan nuclear-capable intercontinental ballistic missile thar a enchhin.
Russia president Vladimir Putin chuan an missile enchhin chu khawvela a ṭha ber nia sawiin, an ram hmelmaten ngaihtuahna thar an sen phah ngaihna khawp a ni, a ti.
Hun rei tak an nghah hnuah, Sarmat missile chu a vawi khatna atan Russia hmarthlang lama Plesetsk aṭangin an kapchhuak a, km 6,000 dawna hlaa awm Kamchatka peninsula-a an target siam chu kahfuh a ni tih an sawi.
Kum tam tak chhung siam danglama an thawmṭhat, Sarmat missile enchhinna hian khawthlang lamte mak tih a hlawh hran lo a, mahse politics thila inbeihna sang tak a awm laia an enchhin erawh mak an tih thu a sawi. February 24-a Ukraine do tura Russia sipai ṭhahnem tak tirhluh an nih hnuah pawh khawpui pawimawh leh lian ho an la chuhsak thei lo a ni.
"Complex thar hi tunlai thiamna sang ber hmanga thuam niin anti-missile defence zawng zawng pawh paltlang thei khawpa ṭha a ni. Hei aia ṭha hi khawvelah a awm lo a, hun rei tak chhung chu a awm lawk lo bawk ang," tiin Putin chuan a sawi.
"He ralthuam danglam tak hian kan armed force a tichak zual sauh dawn a, rampawn aṭanga min beitute laka min veng turin a ṭha tawk a, boruak sang tak kara kan ram tihṭhaih leh vau zawnga hmalate pawhin ngaihtuahna thar an neih leh ngei kan ring a ni," a ti.
Kar riat liam taa indo puangtu, Putin chuan khawthlang ram zinga an kawng daltute chu an damchhunga an inchhirna tura chet la lo turin a vau lawk. Russia nuclear ralthuamte chu chechhuak thei tura inpeih reng turin thupek a tichhuak zui bawk. "Tun hmaa nuclear indona thleng tura kan suangtuah phak ngai loh kha, tunah chuan engtik hunah pawh thleng thei a ni," tiin United Nations secretary-general Antonio Guterres chuan thla hmasa khan a lo sawi tawh a ni.
Russia defence ministry chuan Nilaini khan silo launcher aṭangin Samrat chu kahchhuah anih thu a sawi. Russia nuclear ralthuamte hi enchhinna an neih zawh veleh favang aṭangin ramdang hnenah hralhchhuah theih turin ruahmanna an siam tih Roscosmos space agency hotu Dmitry Rogozin chuan a sawi.