Imran Khan-a'n an ban chhanah Pakistan Army chief puh

National Assembly-a no confidence motion a paltlang zawh loh avanga Pakistan prime minister aṭanga bang ta, Imran Khan chuan ban a nihna chhanah Pakistan army chief General Qamar Javed Bajwa chu thui taka inrawlhah a puh.

Mithiamte sawidanin, Imran Khan hian nikuma Army lamin ISI spy agency hotu ruat tura an thlen chu a lo hnawl sak avangin Army lam aṭanga thlawptu pawh nasa takin an tlakhniam phah a, a tawpah chuan inremna siam thei mah se Army nen an inkar chu a ṭha tak tak theih tawh lo a ni. April 10-a paihthlak a nih chhanah pawh khan a puh zui ta bawk a ni.

Twitter kaltlanga party worker hnena thuchah a sawiah, Imran chuan "Kan inrelbawlnaah hian mihring tam tak kan awm a. Mi pahnih khatin thil an tihdik lohin, pawl pumin thiam lohna an nei lo a ni. Mi pakhat (Army hotu Gen. Bajwa sawina) in thil tidik lo se, pawl pumpui chu an dik lo tihna a ni lo a ni," a ti.

Information minister Fawad Chaudhry chuan Nilaini khan news channel hmaah Army leh Khan kaihhruai Pakistan Tehreek-e-Insaf (PTI) sorkar chu hun rei tak chhung an inhmu thiam tawh lo tih a sawi. "Army nena kan inhriat thiam loh tawnnate siam ṭha turin kan tihtheih sang ber kan lan tir a, keipawhin theihtawp ka chhuah a ni. Mahse a hlawhtling thei ta lo a ni e," tiin a sawi.

Pakistan-in kum 73 chhung zet anmahni puala inrelbawlna an kalpui chhung khan, heng hun zinga a chanve chu Pakistan Army thuhnuaiah a lo awm tawh a ni.

Kum 69 mi Khan hi Pakistan prime minister ni tawh zingah Parliament-a no-confidence motion hmanga paihthlak awmchhun a ni. Khan hi Pakistan Muslim League-Nawaz (PML-N) ami Shehbaz Sharif chuan a thlak a ni.