North leh South Korea hotute'n lehkha inthawn tawn

North Korea hotu Kim Jong Un chuan South Korea president kalchhuak tur Moon Jae-in hnenah duhsakna lehkha a thawn a, North Korea state media-te chuan ram pahnih tana chanchin lawmawm tak a nih thu a sawi.

North Korean state news, Korean Central News Agency tarlan danin, Moon hian tunkar tir khan Kim hi lehkha alo thawn tawh a, a chawlh hnu thleng pawha Korea ram inpumkhatna atana a thawh chhunzawm zel tur thu a hrilh. Kim chuan hei hi chhang letin, ram tana Moon-a hnathawh tawh zawng zawngte chu chhuanawm a tih thu a hrilh ve bawk.

South Korea chuan nimin khan ram hruaitu pahnihte hian lehkha an inthawn tawn ngei tih an nemnghet bawk.

Korean peninsula-a boruak sang tak an neih lai a ni a, satellite imagery aṭanga a lan danin Punggye-ri nuclear test site aṭangin ralthuam thar enchhinna nei turin an inbuatsaih mek nia a lan thu leh Pyongyang chuan kum 2018-a an lo khar tawh chu tharthawh tuma hmalakna an kalpui chho leh nia ngaih lai mekin ram pahnih hruaitute hian duhsakna lehkha hi an inthawn tawn a ni.

SKorea president Moon hian a kum nga term a hmang zo dawn tawh a, May 10-a President-elect Yoon Suk-yeol chuan a thlak tawh ang. South Korea danah president-te hian kum nga term vawi khat chiah an chelh thei.

Moon hian thuneihna a chan chhung hian North Korea nen indawrna vawi tam tak a a lo nei tawh a, Kim nen pawh vawi thum an inhmu tawh bawk. Kum 1953 aṭanga tun thlenga inremna thuthlung an ziah theih loh Korean War chinfel hman tumin theihtawp a chhuah a ni.