Shanghai-in Covid khuahkhirhna khauh zawk siam

China rama sumdawnna khawpui, Shanghai thuneitute chuan Covid-19 hri kai pung zel avangin khuahkhirhna khauh zawk an siam.

Inkaihhruaina dan siam tharah hian Covid-19 hri kaite an in aṭanga an kal chhuah theih lohna tura electronic door alarm vuahsak te, hri kai awmna inte damdawi hmanga kah thianghlimna tura a chengte insawnchhuah tir vekna turte pawh a tel.

Tun kar tir lam khan mi za tel chu an building kah thianghlim a nih theihna turin chhuah luih tir an lo ni tawh bawk.

Hri leng vangin Shanghai khawpuiah hian kar nga chhunga inkharkhipna an kalpuina tur a ni. Official-te chuan hri kai leh an contact hnaivaite chu sorkar enkawl quarantine-na hmun siamah sawn zel an ni dawn tih an sawi. Hei bakah hian hri kai thar tamna hmunte chu damdawi hmanga kah thianghlim vek an ni dawn bawk a, heng hmuna chengte chu hri kai lo pawn insawnchhuak tura tih an ni dawn a ni.

Beicai leh Pingwang venga chengte chu an chenna aṭangin chhuah lailawk tir an ni tawh a, bungruate tel ṭhain an wardrobe-te chu hawn saa lo dah vek turin tih an ni. An inchhung luhna kawngkharte chu hawnsaa lo dah lawk tur leh an ran vulhte pawh kalsan turin an ti bawk.

Lockdown khauh taka kalpui a nih avangin hmun ṭhenkhatah chuan ei leh in lamah harsatna an tawk ṭan a, kalchhuah phalsak an nih loh avangin sorkarin thlai, sa leh artui a semte chu an nghak tawp tawh a ni. Inkharkhip pawhsei leh hian delivery service, grocery shop website bakah sorkar supply semchhuah thlengin a khawih buai pha tawh a ni.