Sri Lanka-in World Bank aṭangin ṭanpuina dawng dawn

Sri Lanka chuan damdawi leh nitin khawsak mamawh leina atan, World Bank aṭangin thla li chhungin USD maktaduai 300 aṭanga 600 thleng an dawng dawn tih finance minister Ali Sabri chuan a sawi.

Sum lama harsatna nasa tak an tawh mek aṭanga khaichhuah dan ngaihtuah pui tura International Monetary Fund be tura Washington-a cham mek, minister Ali Sabri chuan IMF nena inbiakna hian hun a la duh deuh dawn a, hetih lai kar hian World Bank lam chuan lo puih hi an remti tih a sawi.

Sri Lanka ṭhenawm, India pawhin fuel leina atan USD mtd 500 pek a remti a, hei bakah USD tld khat puk belh tura inbiakna pawh neih mek a nih thu Sabri chuan a sawi bawk. China, Japan leh Asian Development Bank pawh pui tura ngen mek an nih thu Sarbi chuan a sawi bawk.

Sum lama tlachhe mek, Sri Lanka hian ram dang laka leiba a neih USD tld 25 zinga USD tld 7 dawn hi kumina a pek a ngai a ni. Mahse MPF nena inbiakna an neih mek avangin foreign loan an rulhna turte hi tikhawtlai a ni rih tih sorkar chuan a sawi. Hetih lai hian foreign exchange lamah indaih lohna nasa tak a nei mek a, ram dang aṭanga bungrua lakluhna tur pawh a nei tawh lo a ni.

Nitin khawsakna atan mamawh ei tur, cooking gas, fuel leh damdawi-te chu ram chhunga indaih lohna a nasa tawh hle a, a lei tur pawhin darkar rei tak tak intlar a ngai tawh. Fuel man chu ṭum eng emaw zat tihsan a ni a, bungraw hrang hrang man leh zin veivahna mante pawh a to vek tawh a ni. An ramin sum lama harsatna lian tak tawk a, mipuite mamawh hrang hrangte indaih lohna leh thil man sang zelah mipuite chuan president Gotabaya Rajapsaka chu mawhphurtuah puhin, hun eng emaw chen chu bang tura phutin nawrh an huaihawt tawh.