Israel PM-in sipai ngaidam turin a dilsak

Israel Prime Minister Benjamin Netanyahu chuan Israel sipai, Palestinian mi hliam tuar a kahhlum avanga thiam loh chantir tak, Elor Aziar chu ngaidam turin a dil sak.

Israel military court chuan Nilaini khan Elor Azaria (19) chu sipai pakhat a vih hnua kawtthlera hliam tuara mu, Palesti­nian mi Abdul Fatah al-Sharif (21) chu a lu-ah a kah avangin thiam loh a chantir a, Pathianni khian a hremna tur chu puan­chhuah a ni ang.

Azaria chung­chang­ah hian Israel mipui­te ngaihdan a phir a, tam takin Abdul Fatah al-Sharif-a hian Israel sipai a beih avang leh, amah pawh midang tana a hlauh­awm zui zela a lan avangin Azaria-a’n a kaphlum hi thil tihawm tak niin an ngai a, Azaria thlawpna lantirin kawngzawh te pawh an lo huaihawt tawh a ni. Mahse sipaite hotu lam chuan a chetdan hi Israel defence Forces (IDF) kalphung a ni lo a, sipai inkaihhruaina dan a bawhchhia niin an sawi thung.

Court-in thiam loh a chantir hnuah ṭangrual sorkara tel member eng emaw zat chuan Aziar chunga zahngaihna lantir turin an ngen a, an zingah hian Education Minister Naftali Bennet pawh a tel. Mahse Foreign Minister hlui Tzipi Livni erawh chuan court thutlukna chu an pawm tlan a ṭhat thu a sawi thung a ni.

PM Netanyahu pawh­in Elor Azaria chunga ngaihdamna lantir chu a thlawp thu a Facebook-ah a tarlang a, Azaria chunga thil thleng chu amah leh a chhung­te, sipai leh sipai nu leh pate bakah, amah Netanyahu tan ngei pawh a na hle a ni, a ti.