Khawvel nghawng thil thleng lian

Kum 2016 chu Syria buai bawka bul ṭan a nih hnuah Syria buai bawka khar a ni. Syria buaiin kum tluana chanchinthara hmun a luah karah khawvel huap nghawng thil pawimawh tak tak a thleng bawk.

Nobel Peace Prize dawng thei tur khawpa Juan Santos-a hmalakna hi khawvelin a ngaisang a, hei hian Latin America ram hmun tam takah nghawng a nei nghal. Kum 2010 khan Juan Santos hi Colombia President atana lakluh a ni a, president a nih chiah aṭanga hma a lakna nghal chu kum 50 chhung zet buai tawh Colombia rama muanna siam a ni. Communist hel pawl Marxist leh Colombia sorkar inbeihna avangin nunna tam tak hloh a ni tawh a, ramtuileiloin sang tam tak an awm tawh bawk a, mahni awmna hmun ṭhina thlamuang taka awm ngam loh avangin sang tam tak chu an pem chhuak bawk.

Santos chuan theihtawp chhuahin remna a awm theih nan kum 2010 aṭangin hma a la a, a hmalakna chuan rah chhuahin, August 25, 2016 khan communist hel pawl, FARC nen inremna ziak tura inbiakna tluantling a awm thei ta a ni. Inremna tura ruahmanna siam chu Colombia mipuiin vote hmanga an duh lohna an lantir leh avangin inremna awm tur a tikhaihlak a, Santos hian inremna tur dang a ruahman leh. Tichuan he ruahmanna hi November chawlhkar tawpah khan Colombian Congress chuan a pawm ta a ni.

Khawthlang ramten Syria rama roreltu Bashar al Assad paihthlak an duh lai leh, amah paihthlak tuma beitu helte an ṭanpui laiin Russia chuan Bashar al Assad lam a hawi a, chuvang chuan Assad-a dinhmun a ṭha chho leh ta. June 2016 khan Syria sorkar sipaite chu Russia indo thlawhtheihna puihnain helho awp khaw pawimawh ber Aleppo lalet turin an thawk chhuak. Mipui nunauin an tawrh nasat avangin Russia leh US chuan September thla khan inkahhaina tur ruahmanna an siam a, pawm a ni. Mahse inkahhai thuthlung hi bawhchhiat nghal a nih avangin a hlawhtling lo. December 15 khan Syria sorkar leh helte hian Aleppo chungchangah inbiakna an nei a, chutah chuan Aleppo hi Syria sorkar kuta hlan a, him taka helte an inthiarchhuah rem tih a ni a, tihhlawhtlin a ni ta.

Syria buaina avang hian khaw­thlang ramte leh Russia inkarah inpuhmawhna a nasa hle a, mihring dikna leh chanvo nasa taka rahbeh nia tarlan a nih mek laiin Russia leh Syria sorkar lam chuan engmah an sawi lem lo. Syria aṭanga raltlan tam tak avangin Europe ram an buai a, Britain pawhin European Union a chhuahsan hial. Raltlan avanga buaina hian ziaawm lam a la pan loh hmel.

Syria buaina hian nghawng a nei lian hle zel. He buaina behchhana Turkey-in Kurdish helte a beih nasat avangin Ataturk Airport beih a nih phah a, ISIS chuan an tih niin an sawi a, mahse Turkey thuneitute lam chuan Kurdish helte thiltih niin an ngai. Russia inrawlhna avangin Turkey-a Russia palai, Andrei chu kahhlum a ni bawk.

July 15 khan Turkey ram sorkar paihthlak tum a ni a, Erdogan kaihhruai sorkarin sipai chakna hmanga sorkar paihthlak tumna hi an tudawl thei. Turkey sorkar paihthlak tumna avang hian NATO member Turkey leh NATO ram dang inkarah khi leh inrinhlelhna a len phah a, Russia leh Turkey inkara erawh a siamṭha thung. Turkey sorkar chuan paihthlak tumtute hi US-in an mawng a hiahsak niin a ngai.

Philippines president thar Rodrigo Duterte chuan khawvel chanchintharah hmun a chang lian hle. Kum eng emaw ti chen US nen inṭhianṭha tak an awm tawhna pawh a rawn tinghing a, Philippines ram hawi zawng a rawn thlak. Philippines sorkarin ruihhlo do beihpui a thlaknaah ruihhlo zawrh kawnga inhnamhnawih mi 1000 chuang lai mai kahhlum a ni chu khawthlang ramten an dem hle. Duterte hian US nena an inṭhianṭhatna tam tak a titawp a, US president Obama chu 'Sawn lulawk' ti hialin a ko. China lam a hawi a, sipai lamah pawh Russia lam a hawi ṭan niin alang. Russia indo lawng ten Philippines vawi li ngawt an tlawh tawh a, chu bakah Russia hian sipai nunchan zirpuiah Philippines hi a sawm bawk.

Britain chuan European Union aṭanga inlakhranna tur chu vote hmanga ngaihtuahin Britain mipui tam zawkin inlakhran an duh tak avangin Britain PM James Cameron chuan a ban phah. Theresa May chu prime minister a awm zui a, he thil hian United Kingdom inpumkhatna pawh a nghawng a, England mipui tam ber inlakhran an duh laiin Northern Ireland, Scotland leh Wales mipui tam zawk chuan EU chhuahsan an duh lo.

US president thlan chu US-in president a thlan tawha la buai ber a ni hial awm e. Inthlan hmain Democrats candidate Hillary Clinton email chu tuten emaw an hack a, ram venhimna thilah a mimal email a hmang tih hriat chhuah a ni. Inthlanah a tling lo zui ta a, mipui tam takin an duh loh Donald Trump a tling. Donald Trump a tlin hnu hian amah duh lohna US hmun hrang hrangah lantir a ni. Democrats lam chuan Hillary Clinton email hack-tuah hian Russia sorkar an puh a, chu buaina chu tunthlengin an la chai. Hemi kal zelah December thla khan president Obama chuan US-a Russia ram tana palai hna thawk mi 35 lai a hnawh chhuah bakah, Russia sorkarin a luah hmun pahnihte a chhuhsak bawk.