France President atan Emmanuel Macron thlang nawn

France president Emmanuel Macron chuan inthlana a khingpui lian, far right candidate Marine Le Pen lakah chakin, France President atan thlan nawn leh a ni.

Centrist lam Macron hian vote thlak thawh hnihnaah vote tla 58% a hmu phak a, a khingpui Le Pen erawhin 42% a hmu thung a ni.

Macron hi France President zingah kum 20 chhunga term hnih thlan tlin nawn leh hmasa ber niin, Le Pen result aṭanga chhutin far right lamin France-a thuneihna an chan teuh ber ṭum a ni bawk.

Kum 44 mi Macron chuan chona hautak tak a hmachhawn leh nghal dawn. June thla hian Parliament inthlan an nei leh dawn a, France siamṭha leh tura a intiamna tihlawhtling tur chuan he inthlanah hian hnehna an chan leh a ngai dawn a ni.

Central Paris-a Champ de Mars kawtlaia hnehna thuchah a sawinaah, Macron chuan a khingpui far-right lama vote thlaktute laka a lungawi loh thu tarlangin, term tharah pawh kum nga liam ta ami te bawk kha ruat nawn leh an nih tur thu a sawi. "Kan thawhpui zinga lungawi lo leh inhmuhthiam lohna avanga extreme right vote tu te'n an vote na chhan kan hriat a ngai a ni," a ti.

Le Pen chuan Paris khawpuia amah thlawptute hmaa a thusawiah inthlan result chu a pawm thu leh politics chawlhsan tumna a neih loh thu sawiin, France chu a phatsan ngai dawn lo a, June thla legislative election neih tur atan an inbuatsaih reng tawh tih a sawi.