Beijing-in ni 3 awh tur Covid-19 mass testing nei ṭan

China khawpui, Beijing-ah chuan nimin aṭang khan khawpuia cheng mi maktaduai 3.5 chuangte chu Omicron variant vanga hri kai pung chho mek vangin Covid-19 test neihpui ṭan an ni.

Beijing sorkar chuan mi makaduai 3.5 vel chenna, Chaoyang district thuneitute hnenah nimin aṭanga ṭanin, mass nucleic acid testing ṭum thum nei turin a hriattir. Khawpuia hri kai thar zingah Chaoyang district hi an tam zualna hmun a ni. Pathianni khan Beijing-a hri kai thar mi 14 zinga 11 chu Chaoyang district ami te an ni.

District-a hnathawk leh chengte chu a hranin test neihpui a ni dawn a, Thawhṭanni, Nilaini leh Zirtawpniah test hi neih a ni dawn tih Chaoyang disease prevention and control leading team chuan Pathianni khan a sawi.

Pathianni khan Chinese mainland-ah hri kai thar mi 20,190 awm belh lehin, an zinga mi tam zawk te chu natna langchhuak lo an ni. Mi maktaduai 26 chuang chenna Shanghai khawpuiah chuan positive case mi 2,472 leh hri kai natna langchhuak lo 16,983 an awm bawk. Pathianni khan hripui vanga thi mi 51 awmin, ni khata hri vanga thi an tam ber ṭum a ni a, thihpui tawh zawng zawng zat chu mi 138 an ni.