Taliban-in Tik Tok leh PUBG khap

Afghanistan-a rorel mek, Taliban sorkar chuan video sharing application TikTok leh mobile game lar tak PlayerUnknown Battlegrounds (PUBG) chu Afghnanistan ṭhalaite kawng dik loa hruai pengtuah puhin an ramchhungah hman an khap.

Nikum August thla aṭanga thuneihna an chan aṭang khan Taliban-te hian music, movie leh television soap tihchhuah a lo khap tawh bawk a ni.

Thuchhuah an siamah, Taliban cabinet chuan heng application-te hi "ṭhangtharte hruai peng tu" tiin telecom ministry chuan khar turin thupek an tichhuak tih ANI report chuan a tarlang.

Television channel-ah chanchinthar leh sakhaw programme bak an chhuah lo nachungin, cabinet chuan ministry hnenah television channel-ah pawikhawihna leh rilru hruai kawi thei lam thil chhuah lo turin thupek a siam.

Afghan mi zinga 94% chuan nikum August thla aṭanga Taliban-ten thuneihna an chan hnuah an dinhmun chu a chhe tawhin an tuar nasa tawh hle tih an sawi thu Gllur survey chuan a tarlang.

Afghanistan ram pumah hian mipui maktaduai 39 zingah internet hmang thei hi maktaduai kua vel chauh a ni.