Trump-a’n border tax chawitirah Toyota vau

US President-elect Donald Trump chuan Mexico rama car siamna tur hmunpui din tumtu, Toyota Motor chu US-a an car siam an lakluhna tura border tax tam tham tak chawi tirah a vau.

Kum 70 mi, Donald Trump hian President thlan dawna a campaign au hlaah pawh ramdanga thil siamna hmunpuite an ram chhung ngeia dah a, an rama hna tam zawk siam a, America ram chu dah pawimawh hmasak ber a tum thu a sawi a, hei vang hian voter tam takin Hillary Clinton aiin an thlan phah a ni.

Trump chuan, “Toyota Motor chuan Baja, Mexico-ah US tana Corolla car siamna hmunpui bun a tum thu a sawi a, he thil hi kan pawm thei lo. US ram chhungah ngei an hmunpui hi an din a nih loh chuan border tax tam tak an chawi ngei ang” a ti.

Khawvela motor siamtu lian, Toyota hian nikum November thla khan California ramri, Mexico-a Guanajuato-ah dollar tluklehdingawn khat senga plant siamna tur hi a lo tifel tawh a ni. Trump-a thusawi hi chhangin, company chuan customer leh industry-te ṭhatna tura Trump-a kaihhruai sorkar thawhpui an nghahhlelh tawh thu a sawi a, Mexico-a plant siam tum chu kum 2015, April thla khan puan a ni tawh tih sawiin, he thil hian US-a an thil siamchhuah leh hnathawktu an chhawr kawngah harsatna engmah a thlen loh tur thu a sawi.

Company hian hna­thawkah America mi 136,000 a chhawr mek a, US ram chhungah thil siam­na hmunpui 10 a nei bawk.

Donald Trump hian an ram chhungah ngei investment ti turin company liante a phut a, Ford pawhin Mexico rama dollar tluklehdingawn 1.6 senga plant din a tum pawh Trump-a’n a sawi­sel nasat avangin a ṭhulh phah tawh bawk a ni.

Thawhlehni khan Trump chuan General Motors chu Mexico rama Chevrolet Cruze compact car a siam avangin a sawisel a, chhiah chawi turin a lo vau tawh bawk. Mahse company chuan Mexico rama siam car chu US-ah tlemte chauh hralh a nih thu a sawi thung