Bangladesh cafe beihnaa mawhphurtu ber a thi

Bangladesh khawpui Dhaka-a cafe chu nikum khan firfiakten an bei a, ramdang mi 18 an thi a ni. He cafe beihnaa mawhphurtu leh ruahmantu ber nia puh, Nurul Islam Marzan chu nimin zing khan a thi.

Dhaka Metropolitan Police thupuangtu chuan nimin zinga police-te’n Dhaka-a Rayer Bazar bial an dapnaah Nurul Islam Marzan leh firfiak dang nia hriat pakhat ruang hmuh a nih thu a sawi. Marzan hi police-te nen an inkahnaa thi nge, mahni intihlum tih erawh an la hriatchian loh thu a sawi.

Additional Deputy Commissioner Yusuf Ali chuan Marzan hi kum 30 bawr vel a nih thu leh, nikum July 1-a Holey Artisan Bakery beihnaa a ruahmantu ber zinga mi a nih thu a sawi.

Islamic State (IS) firfiak pawl chuan cafe beitu an nih thu hi sawiin, cafe tihchhiat a nih dan thlalak te, firfiakten IS flag nena thla an lakte chu internet lamah an thehdarh a ni. Mahse Bangladesh police-te chuan IS te thusawi hi an pawm lo a, pawikhawihtute chu Bangladesh-a firfiak pawl, kum 1998-a din Jamayetul Mujahideen Bangladesh ((JMB) niin an sawi.

Bangladesh thuneitute chuan JMB hi an rama pawikhawihna hrang hrang, a bikin sakhaw tlem zawk leh ramdang mi leh rights activist-te beihna leh thahnaah an inhnamhnawih fo niin a sawi.