UN Chief-in Putin leh Zelenkskyy inbiakna neihpui dawn
United Nations secretary-general Antonio Guterres chuan nimin khan Moscow a pan a, Russia foreign minister Sergey Lavrov nen an inbiak dawn bakah Russia president Vladimir Putin pawh meeting a neihpui dawn a ni.
UN Associate thupuangtu Eri Kaneko chuan, "Ukraine-ah boruak muanawm leh inremna a awm thuai theihna turin inbiakna hi neihpui a tum a ni," tiin Guterres-a'n Russia a tlawhna chhan a sawi.
April 28 hian UN hotu hi Ukraine-ah a kal leh dawn bawk a, Ukraine foreign minister Dmytor Kuleba leh Ukraine president Volodymyr Zelenskyy-te meeting a neihpui leh dawn a ni. Indona avanga harsatna tawk mek, Ukraine mipuite chhawmdawl hna thawh mek chu chak zawka kalpui zel dan turte chu Ukraine-a UN agency staff-te a sawipui bawk ang.
Guterres hian Russia leh Ukraine president-te hi meeting neihpui a duh thu ziakin a lo hrilh tawh a, heng lehkhate hi New York-a UN Mission-a ram pahnih aiawhte hnenah April 19 khan pek an ni. April 20 khan, UN thupuangtu Stéphane Dujarric chuan,"Hun hrehawm leh khirh tak thleng mek karah, Secretary general hian Ukraine ramah boruak muanawm a awm thuai theihna atan te, United Nations charter leh international law behchhana inbiakna neih thuai hi a duh a ni," tiin a sawi.
UN thuchhuah chuan Guterres hian Turkey ram pawh tlawhin, Turkey president Tayyip Erdogan chu a hmu nghal dawn a ni tih a tarlang. April 18 khan Turkey hian an ramah Ukraine leh Russia ram aiawhte inbiakna a lo buatsaih tawh a ni.