Beijing-ah Mass Covid testing neih chhunzawm

China khawpui, Beijing-ah nimin khan khawpuia cheng mi maktaduai 21 tan mass coronavirus testing neih ṭan a ni.

Beijing thuneitute chuan tun hnaiah khawpui chhunga hri kai an pun chak avangin central district 12-a mipuite chu PCR testing round thum nei turin thupek an tichhuak a ni. Khawpui lun lai ber, Chaoyang district chuan Thawhṭanni aṭang khan mass testing an lo kalpui ṭan tawh a, swab sample lak tir tur pawh an intlar nasa hle.

Nimin aṭang khan district 11 dangte chuan test hi an nei ṭan ve leh bawk. Chaoyang testing order tihchhuah hian nghawng a nei thui hle a, Pathianni zan aṭang khan hlauhthawn luat avanga bungraw leikhawl, panic buying a hluar phah hle a, tualchhung mite chu supermarket-ah thui tak intlarin, state media-in mipui tan supply ṭhahnem tawk tak a awm thu sawi mah se an ring zo lo a ni.

Beijing health official Xu Hejian chuan Thawhṭanni khan khawpuia hri leng chu khuahkhirh theih a la nih thu a sawi. Nimin khan hri kai thar mi 33 an awm. Hetih lai hian hri kai pun tamna, Shanghai-a hri kai thar hi 16,000 aiin an tam zawk.

Thuneitute chuan Thawhṭanni khan Beijing mipuite chu ṭul bik thilah lo chuan holiday lai pawhin khawpui chhuahsan lo turin an ngen.