Khawvela upa ber Kane Tanaka kum 119 mi niin a thi

Khawvel mihring damlai zinga upa bera chhinchhiah, Japan mi Kane Tanaka-i chu kum 119 mi niin Thawhṭanni khan Fukuoka khuaa hospital-ah a thi tih Japanese public broadcaster NHK chuan a puang.

Tanaka hi January 2, 1903 khan Fukuoka region-ah a piang. A pian kum hi Wright unauten thlawhtheihna an khalh hmasak ber kum leh hmeichhe zinga Nobel Prize la thei hmasa ber, Marie Curie-in chawimawina a dawn kum a ni.

Kum 2019 khan Guiness World Record chuan Tanaka hi khawvel mihring damlai zinga upa berah a lo puang tawh a ni. Nikuma Olympic Games torch relay-ah khan tel tum viau mah se coronavirus hri leng vangin a ṭhulh leh ta a ni.

Japan ramah hian kum upa lam an tam a, mipui zinga 28% chu kum 65 leh a chunglam an ni. Nikum September thla thleng khan ramchhungah kum 100 tling tawh, centurians mi 86,510 awmin, heng zinga hmun 10 a ṭhena hmun kua te chu hmeichhia an ni.

Tanaka a boral takah chuan kum 118-a upa French nun Lucile Randon, Sister Andre tiha hriat chu mihring damlai zinga upa ber a ni ta a ni.