Kim Jong-Un-a'n nuclear ralthuam tam zawk siamchhuah tum

North Korea hotu Kim Jong Un chuan Thawhṭanni zana military parade an neihnaah nuclear ralthuam siam hna chu chak taka kalpui a nih tur thu a sawi.

Armed forces din champha lawmnaah hian hman theih loha an hrek mek intercontinental ballistic missiles (ICBM) pawh pholan a ni. March thla khan, North Korea chuan kum 2017 hnua ICBM lian ber enchhinna a lo nei tawh a, ramdangte dem leh sawisel pawh a tawh phah nasa hle. US chuan NKorea ram hrekna eng emaw zat a siam zui nghal a ni.

Nilaini zana military parade-ah hian hypersonic missile-te bakah submarine-launched ballistic missile-te pawh pholan a ni bawk.

Kim chuan North Korean army din champha vawi 90-na puala thu a sawiah hian ramdang vauna chu a bengkhawn lo hle. "Kan ramin nuclear ṭha zawk kan siam belh zel theihna atan a chak thei ang berin hma kan la chhunzawm zel dawn a ni," tiin nuclear ralthuamte chu engtik hunah pawh hman mai theiha peih reng turin thupek a siam tih Korean Central News Agency (KCNA) official report chuan a tarlang.