Brazil President-in Covid-19 a kai

Brazil president Jair Bolsonaro chuan an ram khawpui, Brasilia-a chanchinthar lakhawmtute a kawmnaah Covid-19 a kai tih a sawi. 

Bolsonaro chuan a test result a positive a ni tih nemnghetin, mahse a ṭhat thu leh, harsatna a neih loh thu a sawi nghal a ni. Brazil President hi hripui leng mek hi ngai thutak tawk lo leh, an rama hri darh tur venna kawnga hmalakna pawh ngai pawimawh tawk loha puh a ni fo a ni. Covid-19 chu hri leng naran tia sawiin, hri leng vanga an rama inkharkhipna kalpui pawh a sawisel fo a ni. Hri dona kawnga an hmalak duh dan in an loh avangin a health minister pahnih pawhin an lo ban phah tawh bawk. 

Mask pawh vuah loin Presi­dent Bolsonaro hi mipui zingah a chetla fo a, amah thlawptute nen pawh an inchibai fo a ni. Infiammi ṭha tak a lo nih tawhna chuan hri lak aṭang hian a veng thei dawn nia sawiin, a lo kai a nih pawhin hri leng naran kai ang mai a ni dawn a ni, tiin a sawi. Covid-19 inkharkhipna kalpui chuan an ram economy a tichhia a, hei hian hri leng aiin mipuite tan harsatna a thlen lian zawk a ni, a ti. Brazil ramah hian Covid-19 vanga thi hi mi 65,000 chuang an awm tawh a, hri kai hmuh chhuah tawh hi 15,00,000 an chuang tawh bawk. Khawvelah hri kai tamna ram pahnihna a ni mek. 

Khawvelah coronavirus kai chu mi 1,19,73,641 an tling tawh a, an zinga 5,47,120 in he hri hi an thihpui tawh a ni. Hetih lai hian hri kai hmuh tawh zinga enkawl dam hi mi 69,19,704 an awm tawh. US chu hri kai tamna leh hri vanga thi tamna ber ram a ni zui zel a, kar liam ta khan kar khat chhungin an ramah hri kai thar mi 3,50,000 chuang an awm. Brazil chu a dawtah awmin anni pawh kar khat chhungin hri kai thar mi 2,55,000 chuang an awm bawk. India chu hri kai tamna ram pathumna niin Russia in a dawt a ni.