China-in Hong Kong-ah national security office hawng

China Parliament-in Hong Kong security law siam thar a pawm hnuah, nimin zing khan Hong Kong-ah national security office thar hawn a ni ta. 

Office thar atan hian Causeway Bay-a hotel chu  hman lailawk a ni dawn a, hei hi demo­cracy thlawptuten nawrh leh kawngzawh an huai­hawtna hmun ber, Victoria Park bul hnai maia awm a ni. Office hawnna inkhawm buatsaihah hian Hong Kong chief executive Carrie Lam pawh a tel. 

Hong Kong mipuite'n security law thar hi duh loha ṭum tam tak lungawi lohna an lo lantir tawh avangin, nimina office thar hawnna inkhawm buatsaih pawh hi venhimna khauh tak hnuaiah an nei a, bomb disposal unit thlengin duty tir an ni.

Security law siamthar hi Hong Kong mipuite chuan an inrelbawlna leh zalenna rahbeh sakna turah ngaiin an duh lo hle. He dan thar hnuaiah hian mainland China aṭanga security agent dahte chuan dan kalha che nia puhte chhuina kawngah thuneihna sang zawk an nei thei dawn a, thil tisual nia puhte chu mainland China-ah an chungthu ngaihtuah tura thawn theih a ni dawn bawk. China rama court-te hi Communist Party thunun vek niin, thubuai ngaihtuah sak zinga thiam loh chantir hi 100% dawn an tling a ni.