Eiruk thubuaiah kum 5 tang turin Suu Kyi hrem

Myanmar sipai sorkar court chuan nimin khan Aung San Suu Kyi chu eiruk thubuai 11 a siamsak zinga a thubuai hmasa berah thiam loh a chantir a, kum nga tang turin a hrem.

Nobel prize pawh lo dawng tawh, Suu Kyi hi kum 2021-a sipaiten a kaihhruai civil sorkar thuneihna an paihthlak hnu khan an hreng zui nghal a, thubuai 18 an siamsak tawh. Heng a thubuaiahte hian thiam loh a chang vek a nih chuan kum 190 dawn jail-ah tantir theih a ni ang.

Nimina Naypyitaw court-a a thubuai ngaihtuahtu chuan reiloteah thutlukna hi siamin a puang nghal a ni.

Suu Kyi hi nikum atang khan sipaite hian pawn chhuak thei loin an hreng a, an hrenna hmun hi an puangzar duh lo. Nimina hremna tihchhuah a nih avang hian an hrenna hmun aṭang hian jail-ah an sawn dawn em tih sawichian a la ni lo.

Thubuai thar berah hian Suu Kyi chuan a thlazar hnuaia awm ṭhin amah dotu ni zui ta, Yangon chief minister hlui Phyo Min Thein hnen aṭangin gold kg 11.4 leh USD 6,00,000 dawngah puh a ni. Suu Kyi erawhin an puhna hi thu belhchian dawl lo a nih thu a sawi.

Suu Kyi-i party-a official hlui Nay Phone Latt chuan sipai sorkar chu hun rei tak an hrawn tawh dawn loh avangin court thutlukna chu rei vak lo chhung bak hman theih a nih loh tur thu a sawi. "Engtia rei nge khunghran an duh a, kum khat a ni emaw kum hnih emaw, an duh chen chu engpawh ni se kan buai phah lo. Hun rei tak an awh tawh dawn lo," a ti.

Ram dangte chuan Suu Kyi-i thubuai an siamsakte chu thil awm lo nia ngaiin, Myanmar sipai sorkar hnenah pawh chhuah zalen turin an nawr fo a ni. Mahse sipaite hian Suu Kyi hi tlawh an phal lo a, Myanmar tualchhung buaina chinfel dan kawng ngaihtuaha hma la tu, special Southeast Asian palai pawh a hmuh an phalsak lo.

Sipaite chuan Suu Kyi hian thil a tihsual avangin thubuai siamsak a ni a, independent judiciary neih aṭangin a chungthu hi a rel a ni, a ti. Ram dangte sawiselna chu hnawlin, an ramchhung inrelbawlnaa inrawlhah a puh.