Russia-in Poland hnena gas supply a titawp

Russia chuan Yamal contract hnuaia Poland ram tana gas an pek ṭhin chu nimin aṭang khan an titawp lailawk tih European Union network of gas transmission operator data chuan a tarlang. Ukraine laka an chetdan avanga Russia leh khawthlang ram inkara khi awm chu a zauh belh zel a ni.

Poland ang bawka NATO leh EU member ni lai, Bulgaria chuan Russia hian an ram tana gas an pekchhuah ṭhin chu an titawp dawn tih an sawi bawk.

Ukraine chuan Europe ramte nena an thawhhona tihchhiat tuma Russia puhin, energy lamah blackmail tumah a puh. Ukraine president Volodymyr Zelenskyy chuan, "Russia hotuten an tum ber chu Ukraine ram lak sak mai ni loin, Europe ram laili leh khawchhak lamte ṭhiatdarh a, democracy tihchhiat vek a ni," a ti.

Poland-in Gazprom nen gas supply contract hi kum khatah cubic meters (bcm) tld 10.2-in inremna an siam a, hei hian an ram mamawh 50% a phuhruk pha a ni. Poland sorkar hnuaia mi, PGNiG chuan Gazprom-in Ukraine leh Belarus kaltlanga gas a pek chu nimin zing dar 8 aṭang khan a titawp tih a sawi. Mahse gas hi khawlkhawm sa an ngah a, gas storage-ah pawh 76% vel a la awm tih a sawi.

Russia president Vladimir Putin chuan an ram aṭanga gas laluttute chu Russia pawisa, rubble chauha pe turin a lo ti tawh a, hei hi ram tlemte chauhin an kalpui thei a ni.