US-in nakkum July-ah WHO chhuahsan a tum
Kum 70 chuang zet World Health Organization (WHO) member a nih hnuah United States chuan nakkum July 6-ah WHO member a nihna aṭangin ban a tum tih United Nations (UN) chuan a tarlang.
WHO member aṭanga US inhnuhdawh a tum chhan hi Covid-19 hri leng chungchanga WHO hmalakna chu mawhphurhna hlen loh leh China thu thua awm nia a puh vang a ni. US president Donald Trump chuan WHO chu China uite tiin a lo sawi tawh bawk.
Covid-19 dona kawnga WHO hmalak danah a lungawi theih loh avangin President Trump hian May 29 khan WHO member a nihna aṭanga US a inhnuhdawh tur thu hi lo sawi tawh a ni. Thawhṭanni khan President Trump kaihhruai sorkar chuan UN Secretary-General Antonio Guterres hnenah WHO member a nihna aṭanga US a inhnuhdawh thu hi ziakin a thehlut ta a, nakkum July 6-ah WHO chu a bansan tawh dawn tih a ziak a ni.
Hetih lai hian November thlaah US president thlan thar a ni dawn a, inthlanah hian Democrats lam candidate candidate Joe Biden-a'n hnehna a chang a nih chuan he thutlukna hi tihdanglam a nih leh a rinawm thung. April thla khan Trump chuan na takin WHO hi a sawisel a, hri leng chungchangah China-in thu dik tawk lo a sawi tiin China chu a puh a, China thu sawite chu WHO hian a lo thlawp niin a sawi a, hei vang hian khawvelah pawh hri hi a darh phah zual niin a sawi bawk. April 14 khan Trump chuan US-in WHO-a fund a pek chu tihtawp a nih thu a sawi a, May 18 khan US chuan WHO chu hri an buaipui chungchanga an hmalakna te enfiah turin ni 30 chhung hun a lo pe tawh bawk a ni. US hi WHO donor lian ber a ni a, kum 2019 khan agency tan hian US dollar maktaduai 400 chuang a pe a, hei hi WHO budget aṭanga 15% dawn a tling pha a ni.