Thailand tuilian-ah mi 12 an thi

Thailand chhim lama ruahsur nasa avanga tuilianah mi 12 an thi tawh a, thingtlang khaw eng emaw zat chu tuilian hian a chim tawh a ni.

Tuilenna biala cheng mi tam tak chu hmun him lamah an tlanchhia a,ṭhenkhat chu inchungahte an awm zui niin interior ministry chuan a sawi. Tuilian tuarte chhanchhuah hna hi thawh mek ni mah se, ruahsur nasa hian transport service lam a nghawng buai hle.

Ruah hi ni hnih chhung chu nasa taka a la sur zui rin a nibawk.

Ruahsur nasa avanga tuilian bahawk hian school building tam tak a len chhia a, Thailand chhim lama power line-te a tichhe bawk a ni.

Kar kalta Zirtawpni khan ruahtui 162 mm (6.4 in) a tlak avangin Nakhon Si Thammarat province airport chu khar a ngaih phah niin thuneitute chuan an sawi.

Thailand Meteorological Department official chuan an dinhmun chu a ṭha lo hle niin a sawi a, chhim lamah chuan ruah a la sur nasa hle tih a sawi.

Thailand navy-te chuan chhanchhuah leh chhawmdawl hna thawh nan an lawng lian ber a tir a, he lawng hi command centre atan hman nghal niin, helicopter leh lawng te zawk hmangin chhawmdawlnate thawn chhuah an ni.

Thla hmasa khan ruahsur nasa avanga tuilian­in Thailand chhim lam hmun tam tak a lo tichhe tawh bawk. November - January thla chhung hian Thailand ramah hian khua a ro ṭhin hle a, mahse kuminah chuan ṭum dang ang lo takin ruah a sur nasa hle. Hei hian Thailand-in sum a lakluhna hnar pawimawh tak pakhat, ramdang mi khualzin lut tur thlengin a nghawng a ni.