Israel-in UK politician lakah ngaihdam a dil

Israel embassy chuan UK Deputy Foreign Secretary Sir Alan Duncan-a chung­changa an staff member pakhatin ṭawngkam mawi lo tak a hman avangin ngaihdam a dil.

Alan Duncan-a hian Israel-in Palestinian ram a luahsak, West Bank-a Juda-te chenna tur in a sak chungchang chu a sawisel a, hei hi Israel embassy staff member pakhat chuan chhang letin, Duncan chu an la tichhiat tur thu a sawi.

Israel embassy-a senior political officer, Shai Masot-a’n Duncan chungchang a sawina hi Al Jazeera Investigative Unit-in thla ruk chhung a ruka enthla a, video-a a lo lak ruknaaṭangin hriatchhuah a ni. An thil lakruk aṭang hian Israel palai leh British-a sorkar hnathawk pakhatin senior politician-te tihchhiat tuma an ruahman dante hailan a ni.

Video-a lak rukah hian UK-a rorellai, Conservative Party deputy chairman, Robert Halfon-a chief of staff ni lai, Maria Strizzolo leh Masot te inbiakna hi a lang a ni. Masot chuan Strizzolo-i hnenah hian tihchhiat a duh MP te hming list chu a pe thei ang tih pawh a hrilh.

Masot chuan Duncan-a hian kum 2014 khan Israel dikna chanvo neih chu a thlawp thu sawi mah se, Palestinian rama Juda mite tana in sak chu dodalin, hei hi khawvel mithmuhah Israel hmel tichhe zualtu niin a ngai a ni, a ti. Hmingchhiatna lian tham vak lo hmangin Duncan hi tihchhiat a nih theih tur thu Strizzolo pawhin a sawi. An inbiaknaah hian Masot chuan British Foreign Secretary Boris Johnson chu mi a, mawhphurhna engmah hre lo niin a sawi bawk a, mahse Strizzolo-i chuan lo chhanin, Israel thlawp tlattu a ni, a ti.

Al Jazeera Investigative unit-in Masot leh Strizzolo-te inbiakna hi a puanzar hnuah, international media lamah pawh a darh chak hle. He thil thleng vang hianMasot pawh a hna aṭangin ban a ni thuai dawn niin Israel embassy chuan a tarlang a, UK-a Israel ambassador Mark Regeve chuan Masot-a thusawite chuan embassy chuan a pawmpui lo tih a sawi bawk.