Jerusalem-ah motor-in sipai pali chil hlum

Israel khawpui Jerusalem-ah Pathianni khan mi pakhatin a truck-in Israel sipaite a su lui a, sipai pali a chil hlum bakah, mi dang13 in hliam an tuar.

CCTV footage-a a lan danin truck khalhtu hian kawngpui aṭangin sipai awmna lamah chak takin a motor hi a khalh a, sipaite hi a sut thluk hnuah a tlan let leh a, a chil zui a ni. Truck-in a chil hlumte hi hmeichhe pathum leh mipa pakhat an ni a, kum 20 bawr vek an ni. Truck khalhtu hi sipaiten an kaphlum zui nghal a ni.

Israel police hotu Roni Alsheich chuan pawikhawihtu hi Palestinian mi, East Jerusalem-a cheng niin a sawi.

Pawikhawihna thlenna hmun hi, lenvahna hmun lar tak Armon Hanatziv a ni.

Police thupuangtu Micky Rosenfeld chuan, he thil thleng vang hian khawpui chhungah venhimna pawh tihkhauh nghal a nih thu a sawi.

Pathianni tlai khan Prime Minister Benjamin Netanyahu chuan pawikhawihna thlenna hmun hi a tlawh nghal a, Defence Minister Avigdor Lieberman-a’n a ṭawiawm. Hruaitute hian he hmuna chhanchhuah hna thawktute leh security official-te an kawm nghal a ni.

Jerusalem Mayor Nir Barkat chuan, mipui­te chu misual thiltih avanga chiai lo turin a chah a, pawikhawihtute chuan an thiltih man an la tel ngei dawn tih a sawi bawk. Barkat chuan,”Firfiakte chuan eng hmanrua pawh hmangin Juda mite tihhlum an tum a, mipuite nunphung tihchhiat vek an duh a ni”, a ti.

Hetihlai hian Palestinian firfiakpawl, Hamas chuan Juda mite bei a, sipai pali tihhlumtu chu an fak thu an sawi thung. Hamas thupuangtu Abdul-Latif Qanou chuan, “Mi huaisen thiltih a ni” a ti.

United Nations Security Council chuan Jerusalem-a pawikhawihna thleng chu an demthu sawiin, firfiaka chetna reng reng chu pawm theih a ni lo tih an sawi. Thuchhuah siamin, UNSC chuan he pawikhawihna thlenga mawhphurtute chu man chhuah ngei an duh thu an sawi a ni.