Israel PM-in an chhungkaw chaw ei man pek a intiam
Israel prime minister Naftali Bennett chuan Prime Minister chenna ina an chhungkaw ei leh in man chu ama pawisa aṭanga pek zel a tum thu Nilaini khan a sawi.
Tun hnaia TV report-in PM Bennett-a private in, official PM residence atana hman mekah an ei leh in atana sum an hman tam dan a tarlan avangin PM Bennett hian sawisel a hlawh hle a ni.
PM chenna tan hian mipui chhiah pekkhawm aṭangin thla tin USD 26,400 vel sen ziah a ni a, heng zingah hian ei leh in man atan USD 7,400 an seng ṭhin. PM chuan an tihdan hi dan mil veka tih niin a sawi a, mahse sawiselna a tawh zui nasat tak vangin an chhungkaw ei leh in man chu ama pawisa bil aṭanga a pek zel tawh dawn thu a sawi leh a ni.
Prime Minister Office chuan PM hlui Benjamin Netanyahu khan sum hi a hmang nasa zawk hle tih tarlangin, Jerusalem-a PM official residence leh a private inah thla tin USD 84,3000 vel a hmang ral ṭhin niin a tarlang.
Self-made millionaire, Bennett hi nikum June thlaa Prime Minister atana lakluh a nih hnuah pawh, Tel Aviv daifema Raanana-a a mimal inah a khawsa zui zel a ni. Mahse kar liam ta khan Channel 13 TV chuan PM chenna inah hian sorkar sum tam tak chu staff, in tihfai leh ei leh in leina atan hman ral a nih thu a report a ni.
Hemi hnu hian Bennett chu Facebook lamah insawifiahin, PM chenna in tana sum sen hi prime minister a nih hnuah a tlahniam nasa hle tih a sawi a, khawsak nawmsak tum lutuk nia an puhna chu a nuihzathlak zawk tih a sawi. An chhungkua, member paruk chuan danin phalsak mah se eisiamtu hran an ruai lo a, restaurant aṭangin ei turte chu an order zawk ṭhin tih a sawi. PM hlui Netanyahu-te chhungkua ei tur atan thla tin USD 11,000 an hmang ṭhin a ni, a ti.
A insawifiah hnuah pawh mipuite lam aṭanga sawiselna a nasat avangin, PM Bennett chuan a mimal pawisa aṭangin an chhungkaw ei leh in man chu a pe tawh dawn tih Nilaini khan asawi ta a ni. "Kan thiltihte kha dan mil veka tih ni mah se, mipui zinga boruak an chawh chhuah dan hi ka hrethiam a ni. Hei vang hian ka staff-te hnenah pawh kan chhungkaw ei leh in man chu ka mimal account aṭanga pek zel tur a ni tih pawh ka puang nghal a ni," tiin a sawi.
"Pawisa emaw mite zah kai tur emaw a he hna hi thawk ka ni loa, Israel khua leh tuite tan ka theihna zawng zawng hlan tura inpe ka ni. Chutiang tur chuan kan thawk chhunzawm zel dawn," a ti.
Politics a luhchilh hma hian Bennett hian a hi-tech company din pahnih chu USD maktaduai 250 chuangin a hralh a ni. Israel PM hlawh hi thla tin USD 16,500 a ni a, Israel mipui thlatin lakluh chawhrual chu USD 3,400 a ni.