Putin-a'n Russia hmalakna dotute rang taka chhanletah vau

Russia president Vladimir Putin chuan Ukraine an beihna kawnga ramdang inrawlhte chu ralthuam thar ber hmangin a rang thei ang bera an chhanglet nghal tur thu a sawi.

"Kan hmalak mekna te pawnlam aṭanga min tibahlah tum leh min vau tute chu a rang thei anga chhanlet nghal an ni ang," tiin Putin chuan ram hruaitute hmaah Nilaini khan a sawi.

"Ralthuam kan nei vek. Keini chuan mite neih ve loh ralthuam chungchuang tak kan nei a ni. Mahse kan chapo pui dawn lo a, hman a ṭul hunah erawh kan thawhchhuahpui ang," tiin President chuan eng hmanrua tak nge a nih a sawi lang lo thung.

Russia thuneitute chuan a ṭul dan anga chhang let tur hian engkim an inpuahchah lawk vek tawh tih an sawi.

Kar hmasa kha Russia chuan a missile thar ber, RS-28 Sarmat inter-continental ballistic missile chu hlawhtling takin a lo enchhin tawh a ni. Nuclear-capable missile thar hi an thlawh chak leh chet ran em avanga khawi ram defence system pawh paltlang vek thei Avangard hypersonic gliders ṭhahnem tak a keng tel thei tih RT chuan a tarlang. US leh NATO ramte chuan hypersonic ralthuam hi hman tur an nei lo.