Pakistan PM hlui Benazir Bhutto fapa Foreign Minister atan lalut

Pakistan politics lama mi hlun chhungkaw zinga mi leh, prime minister hlui Benazir Bhutto-i fapa naupang ber Bilawal Bhutto Zardari chu Nilaini khan prime minister Shehbaz Sheriff kaihhruai sorkara foreign minister ni turin an lalut.

Bilawal hian chona lian tak tak hmachhawn tur a nei chho nghal dawn a, heng zingah hian US nena an inhmuhthiam lohna siamṭhatte leh an ram ṭhenawm India nen inremna zawnga inbiakna siamthar te a tel.

President Arif Alvi chuan kum 33 mi, Bilawal hi President chenna Aiwan-i-Sadr-ah hun tawite hmangin Foreign Minister atan hian rinawmna thu tiamtirin a lalut a, he hun hi Prime Minister Shehbaz, president hlui Asif Ali Zardari leh official-te bakah Pakistan Peoples Party (PPP) hotuten an telpui.

Bilawal hi sorkara dinhmun pawimawh chelh tura an ruat vawi khatna tur a ni. Kum 2018 khan National Assembly member ni tura thlan tlin a ni. Pakistan-in foreign policy chungchanga harsatna lian tak an hmachhawn lai leh chelhdingtu an mamawh laia ministry of foreign affairs hotu atan dah a ni ta a ni.