UN hotuin a tlawh laiin Russia-in missile-in Kyiv a kap ; US-in Ukraine tan ṭanpuina sum tam zawk pek tiam

U.N. secretary general Antonio Guterres-a'n Ningania Ukraine khawpui, Kyiv a tlawh lai mekin Russia chuan missile pahnih-in he khawpui hi an kap tih Ukraine official-te chuan an sawi.

Rocket pakhatin Ukraine-a Shevchenko district chu kah a ni a, pakhat zawk chuan building chhawng 25-a sang fuhin mi 10 in hliam an tuar tih an sawi bawk.

Russia chuan Kyiv khawpui hi an lak mai theih loh avangin April thla tir lam khan a sipaite chu alo hnukkir tawh a, Ukraine khawchhak lam an bitum chhunzawm leh zawk a ni.

UN hotu hian Russia leh Ukraine inkara remna kawng zawngin hma a la a, Russia a tlawh hnuah Ukraine hi a tlawh leh a ni. Ningania Ukraine president Volodymyr Zelenskyy nen inbiakna an neih zawh hnu deuh lawkah bomb puak ri hi hriat a ni zui a ni.

"Kyiv an bei a, min ṭhawng hle a ni. A hmuna ka awm vang ni loin Kyiv chu Ukraine leh Russia tan pawha khawpui thianghlim a nih vang a ni," tiin Guterres chuan a sawi.

Guterres chuan Zelenskyy chu khawchhak lama Russia-in a bitum mek, Donbas region leh chhimchhak lam a lawng chawlh hmun pawimawh, Mariupol-a steel plant-a Ukraine fighter la awm mekte hruaichhuah dan turte a sawipui a ni.

Russia president Vladimir Putin chuan Thawhlehnia Guterres nen an inbiaknaah, plant-a mihring tang mek hruaichhuah hnathawh chu U.N. leh Red Cross kuta dah chungchang chu a thuphungin a lo remti tawh a ni. Ukraine official-te chuan Russia chu mitang mek man tumah a puh a, mahse an puhna hi Moscow chuan a pha thung.

Biden-an Ukraine tan USD tld 33 pek tum
US president Joe Biden chuan Ningani khan Congress hnenah Ukraine ṭanpuina atan USD tluklehdingawn 33 pek a rawt a, ralthuam, silaimu leh sipaite chhawndawlna atan USD tld 20 ruahman sak a tum thu a sawi a ni.

He chhawmdawlna hi September thla thlenga an mamawh daih tura ruahman niin, United States leh an thawhpui ramte'n February 24-a Russia-in Ukraine a do avanga hremna tura an hmalakna kal zel a ni. US leh a thawhpui ramte chuan Russia hrekna hrang hrang hi an lo tichhuak tawh bawk.

"Ukraine-in zalenna an chan theihna tura kan ṭanpui theihna kawng khat atan he bill hi kan mamawh a ni," tiin Biden chuan a sawi. "He indona rahchhuah hi a rapthlak a, mahse tharum thawh zawnga chetna erawh a nasa zual dawn chauh a ni," a ti.

Russia chuan mahni inrawlh ngam loa indona tipunlun tuah NATO chu a puh a, tunkar chhung khan an thungrulh dan tur kawng hrang hrang an siam thar a ni. Poland leh Bulgaria ramte chu Russia pawisa, ruble hmanga an pek duh loh avangin gas supply an pekchhuah chu Nilaini aṭang khan a titawp sak. Hei hi an ram hrekna siam a chhanletna lian tham ber a la ni.