Iran-ah kum 2021 chhungin mi tihhlum an tam

Iran president atana Ebrahim Raisi thlan tlin a nih hnuah, nikum khan mi tihhlum chu kum 2020 aiin 25% in a pung niin campaigin group pahnih chuan an sawi.

Norway-a hmunpui nei Iran Human Rights (IHR) leh France-a Together Against the Death Penalty (ECPM)-ten an tarlan danin, mi 333 aia tlem lo tihhlum an ni a, ruihhlo kaihhnawiha thiam loh chantira tihhlum chu 126 awmin, kum hmasa aiin a let ngain an tam zawk. Thi zat hi official thuchhuah leh Iran ramchhunga thudawnna aṭanga an lakkhawm an ni.

Nikum October thla khan, UN human rights expert chuan Iran-a mi tihhlum zawng zawng deuh thaw chu chhan awm mumal lo a nih thu sawiin, international law bawhchhiatna lian tak anih avangin Iran chu death penalty titawp turin a lo ngen tawh bawk.

Iran penal code hnuaiah hian international law-in 'most serious crime' in a huam loh, ruihhlo tawlhruk chungchangah pawh thi tura hremna hi pek theih a ni.

UN expert chuan chhan holam tak tak avanga thiam loh chang; an pathian laka hel nia puh leh eirua a puh chungchangah te, nawrh huaihawtna tel vang leh finfiahna mumal engmah awm loa sorkar laka hel nia puh chungchangah thi tura hremna hi pek a ni fo tih a sawi. Heng thubuai neite hi tihluihna hmangin an tihdik loh nia sawite hi an thubuai ngaihtuahtute hian an puan luih tir ṭhin niin a sawi bawk.

IHR leh ECPM-in Ningania report an tihchhuahah, mi 333 an tihhlum zinga 16.5% te chu official-a puan a ni. Mahse ruihhlo kaihhnawiha tihhlumte erawh chu thuneitu lam hian an report tel lo niin a tarlang.

President Raisi thlan tlin a nih aṭanga thla khat a liam hnu, nikum July thla khan mi 51 tihhlum an ni a, hei hi thla khat chhunga mi an tihhlum hnem ber ṭum niin, September leh December thlate'n an dawt a ni.