Obama’n inthlahna thuchah sawi

US President kalchhuak tur, Barack Obama chuan Thawhlehni khan an ram mipuite hnenah inthlahna thuchah a sawi.

US President kalchhuak turte hian dan tlangpuiin inthlahna thuchah hi Oval Office aṭangin an sawi a, TV-ah pekchhuah a ni ṭhin. Mahse Obama chuan thlahna thuchah hi North America-a convention center lian ber, MCormick Place-a mi 20,000 pungkhawmte hmaah a sawi thung. He hmun hi kum 2012-a President atana thlan tlin a nih ṭuma a thusawina hmun kha a ni.

Obama chuan America mipuite chu lungrual taka awm zel tur leh, an ram democracy humhalh tura theihtawp chhuah zel turin a fuih. An inthlahdah chuan democracy dinhmun chu a nghing mai thei zel a ni tiin, pawn lam aṭanga an ram pumkhatna tihchhiat tuma beihna lakahte an inven fimkhur a ngaih thu te, an ram hlutnate an vawnhim zel a pawimawh thu a sawi.

Kum 55 mi Obama chuan, kum 2008-a America mihang president hmasa ber tura thlan tlin a nih hnuah pawh an ramah chuan chi inthliarna lam hawi thil a la thleng fo tih a sawi.

President Obama term hi January 20 hian a tawp dawn a, hemi ni vek hian President-elect Donald Trump chu US President 45-na atan lakluh ani ang. President thlan dawna campaign laiin na tak takin inbei mah se, Obama chuan boruak muanawm leh ṭha tak hnuaiah thuneihna inhlanchhawn a nih tur thu alo sawi tawh a ni.