Ban Ki-moon-a laichinte thamna peah puh

UN Secretary General hlui, Ban Ki-moon-a laichin pahnih, a nau leh a fapa chu American mi pakhat kaltlang a, Middle East official pakhat hnenah thamna sum peah puhin, Manhattan court-ah thubuai siamsak an ni. An pahnih hian an building project chu sorkar suma leitir tumin official hi an tham nia sawi a ni.

Ban Ki-moon thupuangtu chuan a chhungte thiltih chungchangah Ban hian hriat engmah a nei ve lo niin a sawi.

Prosecutor-te chuan Ban-a nau, Ban Ki-sang leh a fapa Joo Hyan Dennis Bahn-te chuan New York-a UN General Assembly neih laiin Middle East ram pakhat hotu chu meeting neihpui an tum niin an sawi. Ban Ki-sang hi South Korean construction firm-a executive a ni a, a fapa hi Manhattan estate agent a ni. An fapa hian leiba an ngah avangin Vietnam-a building complex Landmark 72 chu hralh an tum a, an hralhna aṭangin commission tam tak tak hlep an tum a ni. An building hralh tum hi dollar maktaduai 800 man zet a ni.

US official-te chuan Ban-te fapa hian Middle East official hnenah hian thamna sum tam tham tak an pe a, an hralh tumna ram hotu pawh hmu a, inremna hi tihfel an tum niin an sawi. Official agent nia insawi, US sumdawng mi Malcolm Harris-a hnenah dollar 500,000 an pe bawk a, an thil zawrh hi an hralhfel hnuah dollar maktaduai 2 pek an tiam leh bawk.