US-a biak-in beitu thi tura hremna pe

Kum 2015-a US-a South Carolina biak-in bei a, Bible study group-te silaia pawngkahtu, Dylann Roof chu thubuai 33 siam­sak a nih hnuin thiam loh chantir a ni a, thi tura hremna pek a ni.

Dylann Roof hi mingo dah chungnun duhtu zinga mi niin, biak-in a beihnaah hian mihang pakua a kap­hlum a ni.

Court-a chungthu ngaihtuah a ni laih hian Roof hi inchhir hmel a pu lo a, jury-te hnenah, “He thil hi ka tih ngei ngei ngai a ni a, tun thleng pawhin ka tih tur dik tak ti niin ka la inngai reng”, a ti.

South Carolina-a mihang biak-in beih a nih chungchang hian US-ah pawh nghawng a nei lian hle a, chi inthliarna lam kawngah inhnialna nasa tak a chawk chhuak a, Confederate flag zar chungchang thlengin sawizui a hlawh phah hle. Mi tam takin Confederate flag hi chi inthliarnna lantirtu, inhuatna lantirna angah an ngai a, Roof-a pawikhawihna thlen hnu hian South Carolina state house-a kum 50 zet flag an lo tar tawh chu lakthlak a nih phah a ni.