Russia-in Ukraine civil mite beiah Ukraine sipaite puh

Russia chuan Ukraine sipaite chu chhim lam, Kherson bialah Ukraine civil mite bei leh thatah a puh.

Russia defence ministry chuan Ukraine sipaite chu Kherson region-a khaw pahnih Kyselivka leh Shyroka Balka-a school, kindergarten leh thlanmual chu bomb hmanga beiah an puh a ni.

Russia sipaite chuan Kherson khua an la tawh a, Russia thuneihna hnuaia awm Crimea hmar lama ram km 100 vel chauha zau chu zuah tawhin, Azov tuipuia lawng chawlhna hmun pawimawh Mariupol khaw tam zawk pawh an awp bet tawh bawk a ni.

Nimina Ukraine sipaiten bulletin an tihchhuahah, Russia sipaite hian Kherson-a ramri hnaiha sorkar rorelna hmun pawimawhte chu tihchhiat tumin an bei mek a, Mykolayiv leh Kryvyi Rih khawpui bei turin ruahmanna an siam mek thu an tarlang. Moscow chuan February 24 aṭanga indo beihpui an thlak tirh lamah Kyiv lak tuma an beihna chu a hlawhchham hnuah, Ukraine chhim leh hmar lak tumin an insawrbing leh mek a ni.

Kar liamta Inrinnia Crimea aṭanga Russia-in missile an kahchhuah hian Odesa-a airport lian bera runway chu an kahchhiatsak tih regional governor Maksym Marchenko chuan a sawi.

Ukraine sipaite chuan airport chu hman chhunzawm theih a nih tawh loh thu leh president Zelenskyy chuan sak ṭhat leh vat a tiam thu sawiin, "Odesa chuan an chunga Russia chetdan chu an theihnghilh tawh ngai dawn lo a ni," a ti.

Indona avang hian Ukraine khawpuite chu an tlusawp a, civil mi sang chuang an thih phah tawh bakah mipui maktaduai nga chuangte chuan an ram chhuahsan tawh bawk.