Sri Lanka President-in a unaupa PM nihna hlihsak remti

Sri Lanka president Gotabaya Rajapaksa chuan ramchhung ei bar dinhmun tlahniam mek avanga politics buaina an neihte chinfel a nih theihna turin, sorkar lailawk siam turah a unaupa, Mahinda Rajapaksa chu Prime Minister a nihna hlihsak a remti niin roreltu zinga mi, Maithripala Sirisena chuan a sawi.

Sirisena chuan President hian Prime Minister thar leh cabinet member chu national council-in a ruat a remti tih a sawi a, cabinet-ah hian Parliament-ah party hrang hrang aiawhte dah tum an ni.

Hetih lai hian PM Mahinda Rajapaksa thupuangtu, Rohan Weliwita chuan President hian PM thlak tum chungchang engmah a sawi lo a, hetiang thutlukna a siam a nih chuan puanzar a ni ngei ang, a ti thung.

Sri Lanka economy dinhmun tlachhia avanga mipuite tawrhna nasa tak a thlen hnuah, an ram mipuite hian sorkar laka lungawi lohna lantirin nawrh an lo huaihawt tawh a ni. Mipuite lungawi lote thlem daih tumin, Rajapaksa hian a cabinet siksawiin, ṭangrual sorkar din pawh a lo tiam tawh bawk. Mahse eptu lam chuan Rajapaksa-te unau kaihhruai sorkar hi zawm an duh lo tih an sawi.

Mipuite thinurna beng daihna atan April thla tir khan cabinet member-te chu an lo bang vek tawh a, an zingah hian Rajapaksa chhungkaw member pathum pawh an tel. Mahse President leh Prime Minister-te erawh chu bang loin, an dinhmun ngai an la chelh chhunzawm zel a ni.