Pakistan PM hlui Imran Khan lakah thubuai thehlut

Pakistan prime minister hlui, Imran Khan leh a cabinet hluite chu PM atana lakluh tak Shehbaz Sharif leh a thawhpuite dodalna thu aupui chungchangah thubuai siamsak a ni.

Saudi Arabia-a Masjid-e-Nabwi-a intawhkhawmnaah Pakistan PM thar Sharif leh a thawhpuite chungchang ṭawngkam mawi lo tak taka aukhum an nih avangin Pakistan-a Punjab police-te chuan mi 150 lakah thubuai an ziaklut a, an zingah hian PM hlui Imran Khan leh a cabinet hluite pawh hi an tel.

Social media lamah pawh Prophet Mosque-a Pakistan mi kalten PM Sharif leh a thawhpuite 'rukru' leh 'phatsantu' tia an au el chungchang hi a darh nasa hle. He thil thleng vang hian tualchhung mi pakhat, Naeem Bhatti chuan complaint thehlutin, mipuite chu mosque tibawrhbang leh muslim te rilru ti naah a puh.

FIR thehlutah hian Imran Khan thlawptu mi 100 chuang zet chu Pakistan aṭang hian Saudi Arabia leh UK-ah PM Sharif leh a thawhpuite dodal tura tirh an ni a, heng mite hi Imran Khan-a party, Pakistan Tehreek-i-Insaf hruaitute thupek anga kal an ni, a ti.

Hetih lai hian Imran Khan chuan Saudi Arabia-a Sharif duh lohna thu aupuitute lakah inhnamhnawihna a neih loh thu a sawi a, "Hmun thianghlimah politics thila ṭawngkam mawi lo tak hmang turin ka ngaihtuahna takngialah pawh tumah ka la ngen ngai lo a ni," tiin a sawi.