Spain-in a ramri hawng ṭan
Europe-a hri leng tuar nasa ber ram zinga mi, Spain chuan hun rei tak inkharkhipna a kalpui hnuah state of emergency a hlip a, ramri a kharte pawh hawngin khualzinte luh a phalsak ṭan ta.
Hri leng darh tur venna atan hian Spain hian thla thum chhung lockdown khauh takin a kalpui a ni.
Prime minister Pedro Sanchez chuan khuahkhirhnate hlih ni mah se, invawn faina lam uluk taka kalpui reng a ni dawn tih a sawi. Social distancing dan pawh hman chhunzawm a la ni a, mipuite chu bazar leh public transport-ah mask vuah vek tura tih niin, an kut pawh fai taka sil fo tura tih an ni bawk.
Spain-ah hian Covid-19 vanga thi hi mi 38,322 an awm tawh a, Europe ram zingah hri vanga thi tam lamah a pathumna a ni. March 14 khan hri leng vang hian ram pumah emergency puan a ni a, hun rei tak mipui pawn chhuah khap a ni.
Hri lengin ziaawm lam a pan zel avangin khuahkhirhna hi hlih a ni a, bazar te pawh hawn a ni tawh a ni. Spain-ah hian tourism sector hi an sum lakluhna pawimawh tak pakhat niin, an ram GDP aṭanga 12% a tling pha. Kumtin mi maktaduai 80 vel khualzin tlawhtu an nei ṭhin.
Australia state-in
emergency pawtsei
Austalia-a Victoria state chuan an state-ah hri kai an pun belh zel avangin state of emergency a puan chu kar li dang a pawtsei a, July 19 thleng a huam ang.
State sorkar chuan June 1-a mi 20 chin awmkhawm a phal chu vawiin aṭangin mi 10 chinah tihhniam a ni leh dawn tih a sawi. Victoria state-ah hian hri kai hi mi 1,836 an awm tawh a, Australia rama hri kai hmuh zinga hmun lia ṭhena hmun khat an tling a ni.
Covid-19 kai
mi mtd 8.9 awm
Khawvel ram pumah coronavirus kai hmuh chhuah tawh chu nimin thleng khan mi 89,39,336 an tling tawh.
Hri kai zinga mi 47,52,782 chu enkawl dam ni tawhin, mi 4,67,133 an thihpui tawh bawk. Hri kai enkawl mek zinga 99% chu an dinhmun a ngaihtuahawm lo nia sawi a ni a, hetih lai hian mi 54,513 (1%) te chu an dinhmun a
ṭha lo hle thung.
US chu hri kai tamna leh hri vanga thi tamna ber ram a ni chhunzawm zel a, Brazil-in dawtin hri kai tam zualna ram dangte chu - Russia, India, UK, Spain, Peru, Italy, Chile leh Iran te an ni.