IMF-in Covid-19 dona turin ram 70 ṭanpui
International Monetary Fund (IMF) chuan Covid-19 dona atan ram 70-te hnenah emergency fund, US dollar vaibelchhe 25 a pe.
Ram 70-te tana emergency fund-a US dollar vbc 25 pek tur chungchang hi kar liam ta Ningani khan IMF thupuangtu Gerry Rice chuan media-te a kawmnaah a lo sawi tawh a ni. A tuk Zirtawpni aṭangin he ruahmanna hi kalpui nghal a ni bawk.
Emergency atana pawisa an pek hi dan pangngai anga IMF-in ram dangte ṭanpuina a pek ṭhin ang a nih loh thu Rice chuan a sawi a, heng pawisa hi nurse, doctor leh healthcare worker-te hlawh atan hman tur a nih thu leh damdawi leh mamawh thil leina tura tih a nih thu a sawi.
Asia khawmualpui leh Pacific region-a ram pasarihte chuan he ṭanpuina hi an dawng dawn a, US dollar vbc 1.5 an dawng ang. Africa khawmualpuia ram 28 ten US dollar vbc 10 an dawng dawn a, ram ṭhenkhat thlan bikte chuan a dang zawng hi an dawng bawk ang.
Covid-19 dona atana IMF-in emergency fund a pek chhuah chhan hi ram 100 chuangin Covid-19 dona atan IMF-ah hian ṭanpuina pawisa an mamawh thu an thlen vang a ni a, a hnuah he ruahmanna hi IMF chuan a kalpui ta a ni.
April thla laihawl khan IMF chuan kum 2020 a khawvel economy ṭhanna tur hi 3% a nih tur thu leh, nakkum a khawvel economy ṭhanna chu 5.8% a nih a rin thu a tarlang.
IMF chuan kumin hi kum 1930 hnu lama khawvelin economy lama harsatna a la tawh nasat ber ṭum a nih thu a tarlang bawk.