Africa-ah hri kai mi 2,80,000 chuang tawh
Africa khawmualpuiah Covid-19 hri kai mi 2,86,141 an awm tawh tih Africa Centers for Disease Control and Prevention (Africa CDC) chuan a tarlang.
Africa CDC hian kar liam ta Zirtawpni khan Africa khawmualpuiah hri kai hi mi 2,75,323 an awm tih a tarlang a, a tukah hian mi 10,818 in an kai belh a ni. Zirtawpni vek khan he hri vanga thi hi mi 7,395 an awm a, a tuk Inrinni khan 7,693 an awm thung.
He khawmualpui huapa hri kai enkawl dam tawh hi mi 1,32,412 an awm tawh bawk.
June 13 khan Africa CDC chuan Africa khawmualpuiah hian hri kai mi 2,25,105 an awm tih a tarlang a, he khawmualpuia ram 43-ah hri a darh tawh thu a tarlang bawk. Mahse kar liam ta Inrinni khan he khawmualpuia ram awm zawng zawng 54-ah a darh tawh tir a tarlang ta nghal a ni.
Africa khawmualpui zingah hian South Africa, Egypt, Nigeria, Ghana leh Algeria ramte chu hri darhna ram an ni a, Africa chhim lamah he hri hi a darh nasa bawk a ni. Hri kai thar hi June 13-20 inkar khan mi 61,036 an awm a, hri kai thar tamna ram hi South Africa, Egypt, Nigeria, Ghana leh Cameroon te an ni a, anni ram panga-a hri kai thar punna hi 63% a tling.