US Secretary of State thar turin Russia hrek a la duh

US President-elect Donald Trump-a’n secretary of state atana a thlan Rex Tillerson chuan, Russia ram chu US tan a hlauhawm nia sawiin, US-in Russia hrekna a hman mek chu hman chhunzawm ṭha a tih thu a sawi.

US Senate Foreign Relations Committee hmaah Tillerson chuan he thu hi a sawi a, Russia lian zel Nato-in a hlauthawng chu thil awm tak nia a ngaih thu a sawi.

Tillerson hi Exxon Mobile chief executive a ni a, Russia President Putin nen kum 1990 chho aṭang khan an inhre tawh a, Putin hian Russia chawimawina sang, Order of Frienship chu kum 2013 khan Tillerson hnenah hian a lo hlan tawh a ni. Hetih hun lai hian Tillerson hian US-in Russia hrekna a siamte a dodal nasa thei hle.

Mahse Nilaini-a Committee hmaa confirmation hearing a neihah, Tillerson chuan Russia hrekna siam mek chu chhunzawm rih a duh thu a sawi ve ta a ni.

Tillerson chuan Islam firfiakte chu a do thu a sawi rualin, US-a Muslim mite luh khapsak chu a thlawp lo tih a sawi bawk. Committee hmaah, “Kan rama luh tumte chungchanga thutlukna kan siam thei hi thil pawimawh tak a ni a, hemi rual hian hnam leh sakhaw bil anga lo hnawl erawh chu ka thlawp lo a ni”, tiin a sawi. Khawvel ram hrang hranga pawikhawihna leh boruak ṭha lo thleng mekte chu an ngaihthah thei lo tih sawiin, an ram dinhmun tiderthawng thei thilte chu an hriatchian a, a beihlet dan tur pawh an ngaihtuah a ngai tih a sawi.