Iran hnenah Airbus jet hlan

Iran chuan France Airbus hnen aṭangin commercial plane hmasa ber tur chu Nilaini khan a dawng ta.

Airbus jet A321 hi Iran Air-in Airbus 100 a lei tur zing ami a ni.

Iran Air Chief Execurtive Farhad Parvaresh chuan an ram civil aviation tana thil chhinchhiat tlak tak a ni tih sawiin, A321 hian France a chhuahsan tawh a, Iran ramah a thlawklut thuai dawn tih a sawi.

Airbus hi kum 37 chuang hnu a, Iran-in thlawhtheihna thar a lei hmasak ber a ni. Tuna an rama thlawhtheihna rual awmte hi kum 1979 Islamic revolution hmaa a lei vek an ni.

Nikum December thla khan Iran chuan Airbus hnen aṭang hian aircraft 100, US dollar tluklehdingawn 18 chuang man leina turin contract a lo ziakfel tawh a ni. Parvaresh chuan, kumin chhungin Iran Air hian Airbus hnen aṭangin thlawhtheihna pariat vel a dawn hman an beisei tih a sawi bawk.

Kum 2016, January thla khan Iran chuan commercial plane 106 leina turin Airbus hi inremna a lo ziahpui tawh a, mahse US Treasury Department aṭanga phalna an nghak a, hei hi nikum November thla khan pek chhuah a ni chauh a ni. Nikum December thla khan Iran Air chuan US Boeing chu commercial plane 80 leina turin inremna a ziahpui bawk. He inremna hi Iran khawpui Tehran-ah ziah a ni a, dollar tluklehdingawn 16.6 sengin Boeing 737 thlawhtheihna 50 leh 777 aircraft 30 a lei dawn a ni. Boeing thlawhtheihna hi kum 10 chhungin Iran hnenah hian hlan a ni ang.