Ukraine-in Mariupol aṭangin mi ṭhahnem tak thiarchhuak

Ukraine khawchhak lama lawng chawlhna hmunpui, Mariupol steel plant aṭangin civil mi 100 chuang chhanchhuah an nih thu President Volodymyr Zelenskyy chuan Pathianni khan a sawi.

UN chuan Azovstal plant-a awmte chhanchhuah hna hi kalpui a nih thu a hmain a lo sawi tawh a, International Committee of the Red Cross chuan civil mite chhanchhuah hna thawhnaah hian an tel thu an sawi bawk.

Russia chuan plant-a civil mi awmte hi 80 vel niin a sawi thung a, Ukraine rama awm zui duh lote chu UN leh ICRC aiawhte kuta hlan an ni tih a sawi. UN leh ICRC hian civil mi eng zat chiah nge an hruaichhuah erawh an puangzar lo.

Russia-in Ukraine a run hnuah mi sang tel thah an ni tawh a, mi maktaduai tel chu hmun him lamah an tlanchhe tawh bawk. Mariupol khawpui leh a chengte dinhmun chu a chhe tawh hle a ni.

President Zelenskyy chuan Azovstal-a awmte an hruaichhuah thu leh, nimin khan Ukraine thuneihna hnuaia awm, Zaporizhzhia-ah hruai thlen an nih tur thu a sawi. A ṭum khatna atan ni hnih chhung chu inkahhai hlawhtling taka hman a ni a, civil mi 100 chuang thiarchhuah niin, hmeichhiate leh naupangte chu thiarchhuah hmasak an nih thu a sawi. Nimin khan civil mite thiarchhuah hna hi chhunzawm a ni bawk.