Saudi Arabia-in Pakistan ṭanpuinan USD tld 8 pek remti

Saudi Arabia chuan sum lama harsatna tawk mek Pakistan chhawmdawlna atan leh forex reserve tlachhe mek chhanchhuahna atan USD tluklehdingawn 8 pek an remti tih media report chuan Pathianni khan an tarlang.

Pakistan hian economy lamah chona hautak tak an hmachhawn mek a, thil man sang chak te, forex reserve tlahniam te, an leiba pung zel leh an ram pawisa hlutna tlakhniamna te an hmachhawn mek a ni.

Financial package pekna tura document pawimawhte chu kar reilote hnuah tihfel vek tuma thawh mek a nih thu report chuan a tarlang bawk.

Pakistan prime minister thar Shehbaz Sharif leh a official-te chuan Saudi Arabia ram hi an chhuahsan tawh a, mahse finance minister Miftah Ismail erawh financial package an dawn tur tifel turin a la cham zui thung.

Pakistan lam hian oil facility chu USD tld 1.2 aṭangin a let, USD tld 2.4-a tihpun an rawt a, hei hi Saudi Arabia pawhin a remti a ni. Hei bakah hian USD tld 3 deposit neih mek pawh nakkum June thleng atana pawhsei an remti.

Saudi Arabia hian kum 2021, December thla khan State Bank of Pakistan-ah USD tld 3-a lo dah tawh a, Saudi oil facility pawh kumin March thla aṭang khan hman ṭan niin, oil leina tur hian Pakistan chu USD mtd 100 a pe bawk.

Oil ngah ram, Saudi Arabia hian Pakistan sorkar hmasa, PML-N sorkar lai (2013-18) khan Pakistan ṭanpuina atan USD tld 7.5 a lo pe tawh a ni. Sorkar paihthlak tak, PM hlui Imran Khan kaihhruai PTI sorkar lai pawhin USD tld 4.2 a pe bawk a, heng zinga USD tld 3 chu a deposit a, a bak USD tld 1.2 chu kum khat chhunga oil facility atana pein, IMF programme nen a thlunzawm a ni.