Turkey parliament-in Libya-a sipai dahluh pawm Greece, Cyprus leh Israel-in dem

Turkey parliament chuan Ningani khan emergency session koin UN thlawp sorkarte ṭanpui turin Libya-a sipai dahluh belh tur thu an pawm.

Libya-a sipai dahluh tur chung­changah hian vote lak a ni a, duh lamah hian vote 325 tlain duh lo lamah vote 184 a tla thung. Sipai dahluhna tur bill hi sorkar lai Justice and Development Party (AKP), Nationalist Movement Party (MHP) leh Felicity Party-te chuan an thlawp a ni. Hetihlai hian Republican People's Party (CHP), the Good Party leh Peoples' Democratic Party (HDP)-te chuan sipai dahluh hi an duh lo thung a, Libya buaina chu inbiakna hmanga chinfel an duh thu an sawi a ni. 

Sipai dahluh tur zat, a hun leh dahna hmun tur chungchangah erawh chuan sorkar hian thutlukna an la siam lo thung. 

Libya hian 2014 aṭang khan civil war an hmachhawn tawh a, UN thlawp  National Accord (GNA) sorkar leh Khalifa Haftar kaihhruai Libyan National Army (LNA) inkarah buaina a chhuak a ni. GNA hi an ram khawpui Tripoli-a inkulh an ni a, LNA hi Tobruk-ah an inkulh ve bawk. 

Greece, Cyprus leh Israel chuan Ningani vek khan thuchhuah siam ve nghalin Turkey parliament thutlukna chu an dem thu an sawi.

Greece prime minister Kyriakos Mitsotakis, Cyprus president Nicos Anastasiades leh Israel prime minister Benjamin Netanyahu-te chuan thuchhuah inṭawm siamin, Turkey thutlukna siam chu United Nations Security Council Resolution 1970 (2011) bawhchhiatna a nih thu an tarlang. International community-in Libya buainaa ralmuang zawnga politics buaina chinfel an tumna kalh a ni tih an tarlang bawk.