UK PM-in Ukraine sipai ṭanpuina tur a puang

Britain prime minister Boris Johnson chuan nimin khan Ukraine sipaite chhawmdawlna atan USD maktaduai 376 an pe dawn tih a puang.

Johnson hian video link kaltlangin Ukraine a an rorelna hmun, Verkhovna Rada-ah an ramin ṭanpuina a pek tur hi a puang a, February 24-a Russia-in a run hnuah Ukraine Parliament-a ram dang hruaitu thu sawi hmasa ber a ni.

Boris Johnson chuan, "Indopui pahnihna hunlaia kan ramin vauna kan tawh lai khan, kan Parliament chuan nangni ang bawkin harsatna karah an ṭhukhawm chhunzawm reng tho a ni," a ti. British mipuite chuan inpumkhatna leh tumruhna nasa tak lantirin, an hun khirh ber chu an dan chhunga an hriatreng turah an siam a ni, a ti.

Urkaine pawh tun hun hi an tana thil chhnchhiah tlak, chhuan lo awm leh zel turte pawhin an sawinawn fo tur an ram chanchin hun pawimawh tak an tawng mek tih Johnson chuan a sawi.

Britain-in sipai ṭanpuina a pek turah hian electronic warfare equipment, counter battery radar system, GPS jamming equipment leh night vision device eng emaw zat a tel. Kar liam ta khan Ukraine tan hian Russia aircraft laka invenna tur, missile kapchhuak thei armoured vehicle thawn an tum tih an lo puang tawh bawk.

Unmanned Aerial Vehicle (UAV) system pawh Ukraine tan hian an thawn chhuak thuai dawn tih sawiin, PM Office chuan Ukraine khawchhak laka civil official-te venhimna leh, inbeihna thlen mekna hmuna civil mite thiarchhuahna kawnga pui turin specialised Toyota Landcruiser eng emaw zat a thawn mek bawk a ni.

Russia chuan khawthlang ramten Ukraine puihna atana indona hmanrua a thawn belh zel chu sawiselin, hei hian buaina a tipunlun zawk zel dawn a ti a, Russia chuan ram dang rawn inrawlhte chu bei let turin dikna a nei a ni, a ti.