Putin-a'n cancer treatment la dawn : US media report
Russia president Vladimir Putin chuan cancer surgery a neih a ngaih mai theih thu leh, Russia Federation Security Council-a secretary Nikolai Patrushev hnenah a thuneihna hlanchhawn lailawk tur thu US New York Post chuan a tarlang.
Putin hi doctor-te chuan operation hmachhawn turin thurawn an pe tih New York Post chuan a tarlang. Surgery leh inenkawl hun chhung hi a rei loh tur thu report chuan a sawi bawk. He thu hi Russian Foreign Intelligence Service lieutenant general hlui enkawl, Telegram channel aṭanga an lak a ni tih an sawi.
New York Post report sawidanin, Russia president hi cancer natna bakah natna ṭhahnem tak leh Parkinson disease pawh a nei nia sawi thawm a awm. Hetih lai hian US official-te chuan Putin chungchanga media report chu finfiahna a awm loh thu sawiin, Pentagon thupuangtu John Kirby chuan Thawhṭanni khan thuthang chu a dik a ni tih an nemngheh thei lo tih a sawi.
Putin hian thuneihna hlanchhawn a tum, Nikolai nen hian darkar hnih chhung vel inkawmna an neih thu report chuan a tarlang bawk. "Patrushev hi mi sual a ni. Putin aia a ṭhat bikna a awm lo a. Thuneihna a lo chang a nih pawhin Russia buaina chu a in belhchhah mai mai dawn a ni," tiin Telegram channel chuan a puang. Putin hian a thuneihna hi hun rei tak pek a remtih a rinawm loh thu sawiin, Patrushev kutah hian ni hnih-thum vel bak a awm loh tur thu an sawi bawk a ni.
Security council-a secretary ni lai Patruchev hi Putin thu lakna ṭhin niin, sipai leh venhimna kawnga buaina chungchangahte inkaihhruaina a tichhuak ṭhin a ni. Putin ang bawkin Patrushev hi Soviet KGB leh Russian FSB hnuaiah Russia intelligence agent lo ni tawh a nih thu report chuan a sawi. Kar hmasaa Russian paper, Rossiyskaya Gazeta-in an kawmnaah Patrushev chuan America leh Europe ramte chu Ukraine-a neo-Nazi ideology chawilartu leh buaina tipunlun tuah a puh.
Russia president hriselna dinhmun chungchangah hian thuthang a tam hle a, thla hmasaa defense minister Sergei Shoigu nen inbiakna an neih ṭuma an dawhkan a vawn tlat chuan ngaihven pawh a hlawh hle a ni.