Italy-in thil man sang zel venna atan fuel-a chhiah lak tihniam

Italy sorkar chuan Thawhṭanni khan Russia-Ukraine buaina vanga energy man sang zel avangin natural gas leh methane-a excise tax an lak ṭhin tihtawpna tur dan a siam.

Prime minister Mario Draghi office thuchhuah tarlan danin, gasoline, diesel fuel, liquified petroleum gas leh natural gas lam chi a excise tax an lak ṭhin pawh nimin aṭanga July 8 thleng tihhniam a nih lailawk thu an puang.

Transport lama chhiah an lak ṭhin chu paihsak an ni a, value-added tax chu 5% lak a ni. Gasoline-a chhiah lak ṭhin pawh litre 1,000 zelah euro 478.40-ah tihhniam a ni a, a hma in liter 1,000 zelah euro 564 zel lak ṭhin a ni. Hetih lai hian liquified petroleum gas (LPG)-a kilogram 1,000 zela chhiah euro 227.77 an lak ṭhin chu euro 182.61-a tihhniam a ni bawk.

February 24-a Ukraine leh Russia buaina avang hian Italy-ah fuel man chu a sang chak hle. Indona chhuah hma khan, Russia chu Italy tana natural gas leh petroleum supply-tu lian ber a ni. Mahse, tun hnai khan Italy chuan ram ṭhahnem takte nen gas supply lamah inremna thar an ziak a, heng ram zingah hian Algeria, Egypt, Republic of Congo leh Angola-te pawh an tel a ni. April 21 khan, Italy Minister for Economic Transition Roberto Cingolani chuan nakkum chawhnu lamah chuan Italy chu Russian gas tel loa khawsa thei khawpin an intodelh theih tur thu a sawi a ni.