Pope-in Putin hmu tura Moscow-a zin a duh

Pope Francis chuan Thawhlehnia khan Ukraine-a indona thleng mek titawp turin Russia president Vladimir Putin chu inbiakna neihpui tura Moscow-a zin a duh thu a thlen a, chhanna engmah a la dawng lo tih a sawi.

Italy-a Corriere Della Sera newspaper-in Pope an kawmna hi Thawhlehni khan a tichhuak a ni. Pope chuan Russian Orthodox Church-a Patriarch Kirill chu Putin-a thlawptuah ṭang lo turin a ngen zui a ni.

Indo ṭan tirh lamah khan Pope chuan rin lawk loh takin Russian embassy chu a lo tlawh tawh a, buaina chhuah aṭanga kar thum a liam hnuah Vatican-a palaite chu Putin hnenah thuchah thlen turin a chah zui a ni. A thuchahah hian Moscow-a Putin hmu tura kal a duh thu a hrilh. Chhanna an la dawng lo a, mahse an la ngen zel tur thu a sawi.

Pope chuan,"Putin hian meeting neih hi a duh lo palh ang tih kan hlau hle a ni. Mahse, hetianga nunrawng taka chetna hi engvangin nge kan dan loh ang? Rwanda hian kum 25 liamta khan hetiang dinhmun hi kan lo tawng tawh a ni," tia sawiin, Ukraine-a thihna thleng mek chu kum 1994-a Africa rama tualthahna rapthlak tak nen khan a khaikhin a ni.

Putin chu NATO-in Russia an vau khum avanga thinrima bei let a nih theih thu Pope chuan a sawi bawk.

Ukraine khawpui Kyiv-a zin a tum chungchanga an zawhna chhangin, Francis chuan kal tumna a neih rih loh thu a sawi. "Putin hmu turin Moscow-ah ka kal phawt a ngai a, theihtawpin hmin ka tum ang. Chu pawh kawng min hawnsak chauhin," a ti.

Ukraine-a indona thleng mek avang hian Vatican leh Russian Orthodox Church inkar pawh a ṭhat loh phah a, khawvel puma Orthodox Christian-te ngaihdan pawh a ṭhendarh phah a ni.